شعر وزجل تأليف مروة صبري

حأربي و حلمي جوايا


مروة صبري

بتسلاية بضحكاية بلعباية

بحبك و انت ويايا

بنفس اللهفة من قلبي

بنفس الشوق و من حبي

بتجري عليّه و تجيني

تلاقيني

و تهديني بنظره دافية

بلمعة عينك الصافية

بكلمة ماما بتقولها

و ترقص روحي م الفرحة

بتتعلم و تتكلم

و تكبر بكرة و تسلم

لأمر الله و للسنة

لخير حتشيله للأمة

و لما تصلي يا فجري

و ذكر الله على لسانك يخشعني

و تندهلي

أقوم على طاعة الخالق من بدري

و اصلي وراك

و أدعي ربنا يصونك

يجمع خلفك الأمة

غناك مستوحى م القرآن

ترتل الآذان و تقيم

و تحيي سنة كانت ماتت

و تقتل بدعة ياما عاشت

و اشوفك على كل منبر

طالع ساجد، نازل ساجد

و من أخلاق كده سامية

و بالقرآن على راسك

و حايط قلبك السنة

حتفتح يابني و ادعيلك قلوب الناس

و تدعوهم بوجه بشوش

لا بينفر و لا يكدر

و لا يغتاب و لا يكشر

و حيحبوك، و حيحبوا الكلام منك

و لو ضحكوا ، و لو غضبوا

و لو بكيت عيون و عيون من التوبه، من الخشية

و لو شاعت لسنة الناس

و دلقت حبر بلا إحساس

"شوفوا الشيخ اللي بيعلم و يتكلم!

ده قال امبارح كلام جارح

و أهو سارح بعقل الناس و بيقاوح."

سيبك منهم، ما هم فاضيين

لا هم الدين في قلوبهم

و لا الدنيا خدت منهم و لا اديتهم عيون واعيين

و لا وهبهم الخالق قلب سليم.

و بكرة يروحوا و يزولوا

و يفضل صدق إخلاصك ليوم الدين

بتسلاية بضحكاية بلعباية

حأربي و حلمي جوايا